Anthony Browne-ren obra ezinbestekoetarik bat, album samur bat, umorez zipriztindua, adiskidetasunaren eta elkartasunaren balioaz. 1974an, Kokok, zeinu-hizkuntza erabiltzeko Standford Unibertsitatean trebatutako gorila batek, begira zituen zientzialariei katu bat eskatu zien, eta bere kumea balitz bezala zaindu zuen. Handik hilabete batzuetara, katua desagertu egin zen eta egun batzuetan zehar Kokok bere tristezia adierazi zuen zeinu bidez. Gertaera hori, beste espezieek giza emozioak sentitzeko gai ote diren eztabaida piztu baitzuen, inspirazio-iturri izan zitzaion Anthony Browneri bere obra ezagunenetariko bat sortzeko. «Eder txikia» liburuan, benetako kasuan bezala, zeinu-hizkuntzan mintzatzen dakien eta nahi duen guztia daukan gorila bat bakarrik sentitzen da eta lagun bat eskatzen die bere zaintzaileei. Halaxe ezagutu zuen Eder katemea, zeinarekin esnea eta eztia hartu, paseatu, jolasten den… Zoriontsuak dira elkarren ondoan, harik eta, gau batean, film bat ikusten ari direla, gorila oso urduri, sutan jartzen den arte. Orduan, haren zaintzaileek biak banatzea erabakitzen dute. Une horretan, Ederrek gorilari begiratu eta adiskidetasunaren benetako balioa erakusten dio. Anthony Brownek izugarri maite ditu gorilak, haien indarraren eta samurtasunaren arteko kontrastearen ondorioz, eta lilura hori egilearen lan askotan islatzen da. Album honetako ilustrazio koloretsuetan, fantasia eta umore ukitua dute osagai errealistek, bi pertsonaia maitagarri hauei bizia emateko.