“Musikaren eta literaturaren munduen artean igarotzen ditut orduak, egunak, eta orain literatura musikalari heldu diot, hitzaren botereari aitortza eginez, merezi duen protagonismoa emanez, Nerea Gorritiren laguntzaz eta talentuaz lagundurik, bere ahots paregabeak musikari eta hitzari ematen dizkien kutsu bereziarekin. HITZAHOTS gogoetak dira, bizitzari eta horri darion magiari buruzko hausnarketak. Itsaso zakarretan murgiltzen dira pertsonaiak batzuetan, bakearen, lasaitasunaren, ilusioaren eta desiraren besoetan kulunkatzen besteetan… Bizitzaren metafora gorenean bihurtzeko ahaleginean: artea, edo artearen ispilua behintzat. Disko-liburu honetan jasotako poemek azpimarratu nahiko nukeen istoriotxoa dute atzean. Gazteleraz idatziak izan ziren, baina bat-batean, guztiz ezustean, Jabier Imaz Aierbek idatzitako euskarazko bertsioa iritsi zitzaidan. Sekula ez diot merezi duen moduan eskertuko bere arte poetikoarekin egin zidan oparia, errespetu eta zehaztasun osoz egindako lana” (Karlos Gimenez).