Liburu honek DK V. Poesia Saria eskuratu berri du. Lehiaketa hori 35 urtetik beherako gazteei zuzendua dago, eta dagoeneko hasi da egonkortzen eta ahots berri eta interesgarriak ezagutzera ematen. Ahots horietako bat da Izaskun Igoa Jaimerena nafarra. Gorputzari uko egin gabe, haragoko kezka eta gogoetetan sakontzeko gaitasuna erakusten du bere poemetan. Hotza bazkatzen lanak kontzientzia eta izatea ditu ardatz, denbora eta espazioa, eta horien inguruko gogoeta filosofikoa. Halaber, planteatzen dituen kezkak iritsi egiten dira irakurlearengana, hunkitu egiten dute. “Min handi batek sortu omen zion/idatzitako esaldirik ederrena./Baina ez du minak idazten,/zuk idazten duzu”.