Eleberri honetako protagonista -Stanislaus Demba ikaslea-, goiz batean behartua dago ilunabarra baino lehenago diru kopuru bat biltzera, berari muzin egin dion neskalaguna berreskuratzeko eta biek elkarrekin Veneziara egingo luketen bidaia batekin tentatzeko. Hala, delitu txiki bat egingo du, eta hortik aurrera eleberri poliziakoaren antz handia hartzen du Perutzen obrak: etengabe ihesi eta ezkutuan ibili beharko du Demba ikasleak. Eleberriaren atal bakoitzean, protagonistaren bizitzako pasarte bat agertzen zaigu. Ildo horretatik, bere eleberriak historikotzat hartu izan dira, eta ezagutzera ematen digute -kritika sozial eta guzti-, garai hartan erdi mailako Vienan dauden leku eta jendeak: kafetegiak, bulegoko langileak, irakasle handi-harroak, lapurrak, inudeak, hiriko etxeak eta emakume aberatsak. Eta batak bestearekin zerikusirik ez duten istorioak albaintzen ditu Dembak. Perutzen estiloari dagokionez, bere pertsonaiak guztiz bitxiak dira, eta Bederatzietatik bederatzietara honetako protagonistak ere behin eta berriro egin behar ditu gauza harrigarriak -zein baino zein xelebreagoak-, eta horiei esker istorioa bultzada eta arnasa berria hartuz doa aurrera. Leo Perutzek, gainera, atsegin du irakurlea zalantzan eta zer pentsa jartzen, apur bat E.T.A Hoffmann-en antzera. Hala, bukaeran, irakurleari uzten dio istorioa interpretatzen. Izan ere tentsioa sortu nahi du, misterioa, ikusmina, zer gertatzen ari ote den halako jokabide bitxia edukitzeko. Bederatzietatik bederatzietara film itxurako eleberria da: irudiak azkarrak, elkarrizketak biziak, eta pasadizoak bata bestearen ondoren. Metro-Goldwyn-Mayer Pictures Corporation 1922an egin zen filmatzeko eskubideen jabe, gero dena bertan behera utzi bazuen ere. Gainera, eleberri honetan oinarritu omen zen Alfred Hitchcock, The Lodger filmatzeko. Bukatzeko, zer ikasia ere eman nahi digu Bederatzietatik bederatzietara honek: Lehen Mundu Gerra bukatu eta berehala argitaratua, gorazarre egiten dio askatasunari. Izan ere, Leo Perutzek sokaz eta katez lotuta ikusten zuen gizadia, eta, agian okerragoa dena, gerraren esperientzia latzetik ezertxo ere ikasi gabe.